Прыём заявак у Усходнееўрапейскую школу палітычных даследаванняў
Усходнееўрапейская школа палітычных даследаванняў (УШПД) сумесна з Радай Еўропы абвяшчае набор на праграму 2026 года. Да ўдзелу запрашаюцца грамадзяне Рэспублікі Беларусь ва ўзросце, як правіла, 18-35 гадоў незалежна ад месца пражывання.
Школа з’яўляецца часткай міжнароднай сеткі Школ палітычных даследаванняў Рады Еўропы – прасторы прафесійнага дыялогу і супрацоўніцтва, што аб’ядноўвае прадстаўнікоў грамадскай, палітычнай, экспертнай і акадэмічнай супольнасцяў больш чым у дваццаці краінах Еўропы і суседніх рэгіёнаў.
На працягу амаль дваццаці гадоў УШПД штогод аб’ядноўвае прадстаўнікоў новага пакалення беларускіх прафесіяналаў і лідараў, якія працягваюць сваю дзейнасць і супрацоўніцтва дзеля будучыні Беларусі ва ўмовах глыбокіх грамадскіх і палітычных зменаў. Удзельнікі праграмы адбіраюцца на конкурснай аснове.
Пра праграму
Праграма Школы – гэта гадавы адукацыйны і лідарскі досвед, які спалучае акадэмічную экспертызу, практычныя фарматы працы і ўзаемадзеянне ў міждысцыплінарнай групе ўдзельнікаў. У 2026 годзе асноўная ўвага праграмы будзе прысвечана ролі Беларусі ў зменлівым рэгіянальным і міжнародным кантэксце, грамадскім працэсам і канфліктам, а таксама досведу дэмакратычных трансфармацый і рэформаў.
На працягу года ўдзельнікі:
- аналізуюць ключавыя палітычныя, сацыяльныя і эканамічныя працэсы ў рэгіёне;
- працуюць з міжнароднымі экспертамі і практыкамі;
- удзельнічаюць у практычных сімуляцыях і сцэнарным аналізе;
- распрацоўваюць сумесныя аналітычныя і практычныя праекты;
- атрымліваюць ментарскую падтрымку ад выпускнікоў Школы;
- становяцца часткай міжнароднай сеткі выпускнікоў Рады Еўропы.
УШПД уваходзіць у Асацыяцыю Школ палітычных даследаванняў Рады Еўропы. Дырэктар Усходнееўрапейскай школы палітычных даследаванняў – Аляксандр Дабравольскі, Мэнэджар школы – Валянціна Палевікова.
Больш інфармацыі пра Школы палітычных даследаванняў можна знайсці тут
Каляндар УШПД 2026
Навучанне праходзіць у фармаце трох сесій у краінах Еўрапейскага Саюза і міжсесійнай каманднай працы. Завяршальным этапам праграмы з’яўляецца ўдзел у Сусветным форуме за дэмакратыю (World Forum for Democracy) у Страсбургу. Удзельнікі, якія паспяхова завершаць праграму, атрымліваюць дыплом Рады Еўропы.
Да 25 сакавіка: Падача заявак
Да 5 красавіка: Паведамленне вынікаў адбору
23-25 красавіка: Першая сесія, Вільнюс
28-30 траўня: Другая сесія, Варшава
17-18 верасня: Трэцяя сесія (пра месца правядзення будзе паведамлена пазней)
4-6 лістапада: Сусветны форум за дэмакратыю, Страсбург
Для ўдзелу ў праграме неабходна мець магчымасць наведваць краіны Еўрапейскага Саюза (шэнгенскую візу ці дазвол на пражыванне ў адной з краін ЕС) на ўвесь перыяд навучання. Удзельнікі праграмы аплачваюць арганізацыйны ўнёсак, эквівалентны 100 Еўра, а выдаткі на транспарт, пражыванне і харчаванне аплачваюць арганізатары.
Анкету неабходна падаць да 25 сакавіка 2026 года, 23:59 CET. Пытанні па падачы заяўкі можна дасылаць на адрас: easteuroschool@gmail.com. Інфармацыя пра вынікі адбору будзе даслана да 5 красавіка 2026 года.