Кінафестываль “Паўночнае ззянне” чакае новыя фільмы

Адкрыты прыём заявак на ўдзел у Беларускім конкурсе 11-га кінафестывалю «Паўночнае ззянне»

Сёлета мы шукаем новыя фільмы, зробленыя беларусамі і беларускамі ў 2024−2025 гадах у любой краіне свету і ў любым жанры — дакументальныя, ігравыя, гібрыдныя, анімацыйныя, кароткаметражныя ці поўнаметражныя.

Прыміце да ўвагі, што калі ваш фільм будзе адабраны да ўдзелу, наяўнасць субтытраў на англійскай мове абавязковая. Акрамя таго, у выпадку адбору мы папросім вас своечасова прадставіць неабходныя матэрыялы да фільма.

Чаму варта падавацца?

Мы даём вашым фільмам сапраўдную аўдыторыю — у межах фестывалю гледачы пабачаць вашы працы online і верагодна ў розных гарадах Еўропы на offline-паказах. Гэта не толькі магчымасць падзяліцца сваім фільмам, але і спосаб заявіць пра сябе, паказаць свой талент шырокаму колу людзей. Акрамя таго, конкурс будзе ацэньвацца прафесійным міжнародным журы.

Нам цікава бачыць і дасьведчаных рэжысёраў/ак, і тых, хто толькі пачынае свой шлях у кіно. Мы верым, што кожная гісторыя важная, і кожны голас мае права быць пачутым.

Мы абавязкова адкажам усім, хто падасць заяўку. Калі ласка, набярыцеся цярплівасці: адбор зойме час, і вы атрымаеце адказ прыкладна ў сярэдзіне верасня.

Каб падаць свой фільм для ўдзелу, трэба запоўніць форму да 31 жніўня 2025 года. Калі вы маеце пытанні, калі ласка, пішыце нам у сацыяльныя сеткі ці на пошту support@northernlightsff.com.