Шведскі інстытут чакае заяўкі на праграму SI Baltic Sea and Eastern Partnership Programme

Шведскі інстытут (Svenska institutet) абвяшчае новы конкурс на фінансаванне праектаў у рамках праграмы SI Baltic Sea and Eastern Partnership Programme. Праграма накіравана на ўмацаванне дэмакратыі, грамадскай устойлівасці і ўстойлівага развіцця ў рэгіёне Балтыйскага мора і краінах Усходняга партнёрства ЕС.

Праграма замяняе некалькі папярэдніх ініцыятыў Шведскага інстытута, у тым ліку SI Baltic Sea Neighbourhood Programme, SI Creative Partnership Programme, SI Academy for Young Professionals (SAYP) і SI Leader Lab.

Дзве геаграфічныя часткі праграмы

1. Усходняе партнёрства

Супрацоўніцтва паміж шведскімі арганізацыямі і партнёрамі з Арменіі, Азербайджана, Беларусі, Грузіі, Малдовы і Украіны. Магчымыя як двухбаковыя, так і шматбаковыя праекты. 

Важна: Заяўкі з удзелам Азербайджана, Беларусі і Грузіі не могуць уключаць дзяржаўныя структуры, дзяржаўныя ўстановы або кампаніі, якія кантралююцца дзяржавай. Заяўкі з удзелам Беларусі патрабуюць асобнага разгляду.

2. Рэгіён Балтыйскага мора

Супрацоўніцтва толькі ў шматбаковым фармаце паміж Даніяй, Эстоніяй, Фінляндыяй, Латвіяй, Літвой, Нарвегіяй, Польшчай, Швецыяй, Германіяй. Да праектаў таксама могуць далучацца Малдова і Украіна.

Хто можа падаваць заяўку:

Галоўным заяўнікам абавязкова павінна быць юрыдычная асоба, зарэгістраваная ў Швецыі. Праекты рэалізуюцца ў партнёрстве з арганізацыямі з краін-удзельніц.

Віды фінансавання і сумы:

• Seed funding — 200 000 – 500 000 шведскіх крон, тэрмін 6–12 месяцаў. 
• Cooperation projects  — 700 000 – 2 000 000 шведскіх крон, тэрмін 12–18 месяцаў. 
• Training programmes  — 1 000 000 – 3 000 000 шведскіх крон, тэрмін 12–18 месяцаў (толькі для Усходняга партнёрства).

Праекты павінны быць скіраваны на павышэнне кампетэнцый, развіццё сетак, стварэнне новых метадаў і палітычна значнае навучанне.

Тэматычныя прыярытэты:

Для Усходняга партнёрства: умацаванне дэмакратыі, павага да правоў чалавека, вяршэнства права і гендэрная роўнасць. 

Для краін Балтыйскага мора: вырашэнне агульных грамадскіх праблем у адпаведнасці з ЕС-стратэгіяй для рэгіёну Балтыйскага мора («Save the Sea», «Connect the Region», «Increase Prosperity»).

Тэрміны падачы заявак:

Конкурс адкрыты па 19 мая 2026 года (да 23:59:59 па цэнтральна-еўрапейскім часе).

Заяўкі падаюцца выключна праз анлайн-партал Шведскага інстытута. Рэкамендуецца пачынаць запаўненне загадзя. Перад падачай неабходна ўважліва прачытаць агульныя інструкцыі і дадатак для выбранай геаграфічнай часткі.

Шведскі інстытут правядзе інфармацыйныя семінары ў красавіку і маі 2026 года (на англійскай мове).

Дадатковая інфармацыя, шаблоны дакументаў і спасылкі на партал падачы — на афіцыйнай старонцы праграмы

Пытанні можна дасылаць на balteastpartnership@si.se.

Гэтая праграма — добрая магчымасць для шведскіх арганізацый і іх партнёраў з Беларусі, Украіны, Малдовы, Грузіі, Арменіі ды краін Балтыйскага рэгіёну развіваць сумесныя ініцыятывы ў сферы дэмакратыі, устойлівасці і рэгіянальнага супрацоўніцтва.